"Манчестер Юнайтед" бош мураббийи Эрик тен Хаг ноябрь ойида Англия Премьер-лигасининг энг яхши мураббийи учун мукофотни олди. Бу ҳақда лига матбуот хизмати хабар берди.

Эслатиб ўтамиз, ўтган ойда “қизил иблислар” миллий чемпионатда учта ўйин ўтказиб, учта учрашувда ғалаба қозонишган. Айтиш жоизки, ушбу ўйинларда нидерландиялик мутахассис жамоаси ўз дарвозасидан бирорта ҳам тўп ўтказиб юбормади.

15-турдан сўнг "Манчестер Юнайтед" 27 очко тўплашга муваффақ бўлиб, АПЛ турнир жадвалида олтинчи ўринда бормоқда.

9 декабрь, шанба куни "манкунианликлар" "Борнмут"ни қабул қилишади. Ўйин Тошкент вақти билан 20:00да бошланади.