Хави ва Жоан Лапорта жорий мавсумда иккита чемпионликни қўлга киритишни мақсад қилган.
"Барселона" президенти ва бош мураббийи сўнгги пайтларда энг яхши натижаларга эришмаганига қарамай, оптимист бўлиб қолишга ҳаракат қилмоқда.
AS хабарига кўра, Лапорта ҳам, Хави ҳам январь ойида бўлиб ўтадиган Испания Суперкубоги жамоа учун бурилиш нуқтаси бўлишига ишончи комил.
Ушбу турнирда ғалаба қозониш ҳаётий зарурат сифатида қаралмоқда. Бу трофейни қўлга киритиш клубдаги босимни юмшатиши керак.
Шу билан бирга, мураббий ҳам, президент ҳам биргина унвон билан қаноатланмайди. Улар "Барселона" ўтган мавсумдагидек иккита соврин ютиши мумкинлигига ишонишади. "Блауграна"нинг асосий мақсади мамлакат Суперкубоги ва Ла Лигада ғалаба қозониш. Испания кубоги ҳам жуда ижобий қабул қилинади.
Чемпионлар лигаси ҳақида гап кетганда, ягона талаб - энг юқори савияда ўйин кўрсатиш ва плей-офф босқичларини муносиб ва профессионаллик билан босиб ўтиш.
Хави мавсум охиригача бирорта соврин ютмаса, ўз лавозимидан четлатилишини тушунади.
“Барселона” айни дамда Ла Лиганинг 18-туридан кейин 38 очко билан турнир жадвалида 3-ўринда бормоқда. Клуб “Реал” ва “Жирона”дан 7 очкога ортда қолмоқда.
