"Манчестер Юнайтед" бош мураббийи Эрик тен Хаг "Ноттингем Форест"га қарши АПЛнинг 20-тури доирасидаги сафар ўйини учун кутилаётган бошланғич таркиб, шунингдек, жароҳат олган "манкунианликлар"нинг бир қанча футболчиларининг сафга қайтиши тахминий муддатлари ҳақида гапирди.

"Астон Вилла"га қарши ўйинда қандай таркибда бўлсак, худди шундай бўлади. Ўйлайманки, кўплаб футболчилар январь ўрталарида сафга қайтишини кутиш мумкин. Маунт, Каземиро, Лисандро Мартинес, Маласиа ва биз Гарри Магуайрни кутмоқдамиз, албатта. Биз январь ойида кўплаб ўйинчилар сафга қайтишини кутамиз", - деди тен Хаг "Манчестер Юнайтед" расмий сайтига.

26 декабрь куни АПЛнинг 19-тури доирасидаги уй учрашувида "Манчестер Юнайтед" "Астон Вилла" устидан 3:2 ҳисобида иродали галабага эришди. "Қизил иблислар"нинг ўша куни асосий таркиби Онана, Ван-Биссака, Варан, Эванс, Далот, Майну, Эриксен, Гарначо, Бруну Фернандеш, Рэшфорд ва Хёйлунддан иборат эди. 30 декабрь куни Эрик тен Хаг шогирдлари Премьер-лиганинг 20-тури доирасида сафарда "Ноттингем Форест"га қарши баҳс олиб боради.