Ўзбекистон миллий терма жамоаси эртага БААда Озарбойжон билан ўртоқлик ўйинини ўтказади. Ушбу ўйинда мураббий янги футболчиларни синовдан ўтказиш эҳтимоли юқори бўлса-да, рақибимиз ҳужумчиси Вагиф Жавадов жамоа майдонга фақат ғалаба учун тушишини таъкидлади.

"Ўзбекистон ва Лихтенштейнга қарши ўйинлар ўткинчи мақомида бўлмайди. Терма жамоага янги футболчилар жалб қилинган ва улар синовдан ўтказилиши мумкин. Майдонга ким тушса-да, ғалаба қозонишни истаймиз. Дубайга шунчаки йўл олаётганимиз йўқ", дейди Жавадов.

Ўзбекистон терма жамоаси учун бу ўйинлар нафақат Осиё кубоги-2015 саралаш ўйинига тайёргарлик, балки ЖЧ-2014 саралаш ўйинларига ҳам ҳозирлик вазифасини ўтайди. Ўзбекистонликлар ЖЧ чиқиш учун яхши имкониятга эга бўлиб турганига нисбатан озар футболчиси қуйидагиларни айтиб ўтди:

"Ўзбекистон Осиёдаги саралаш мусобақасида иштирок этмоқда. У ердаги саралаш турнири Европадагига нисбатан кучсизроқ. Шунингдек, Ўзбекистон — кучли жамоа. Унинг таркибида Украина ва Россия чемпионатларида ўйнайдиган футболчилар бор. Лекин Европа ва Осиё турли қитъалардир", дейди ҳужумчи.