ЦСКА ва Ўзбекистон миллий терма жамоаси ярим ҳимоячиси Аббосбек Файзуллаевнинг биринчи мураббийи Дмитрий Ан 20 ёшли футболчининг терма жамоадаги ўйини унга Европа клублари эътиборини жалб қилишига ёрдам беришига умид билдирди.
Эслатиб ўтамиз, айни дамда давом этаётган Осиё Кубогида Файзуллаев бешта ўйин ўтказиб, иккита гол урган. Эслатиб ўтамиз, Ўзбекистон терма жамоаси чорак финалда Қатарга имкониятни бой бериб (1:1, 2:3 – пен) ўз иштирокини якунлади.
“Аббосбек Ўзбекистон терма жамоаси етакчиси эканидан жуда хурсандман. Умид қиламанки, Европанинг йирик клублари скаутлари Аббоснинг ўйинини юқори баҳоладилар. Уни ўз клубларига таклиф қилишларини истардим", - дея мураббийнинг сўзларини келтиради «Чемпионат».
Жорий мавсумда Файзуллаев ЦСКА сафида 18 та ўйин ўтказиб, 2 та гол урди ва 9 та голли узатмани амалга оширди. Ўзбекистонлик футболчи 2023 йилнинг ёзидан буён “армиячилар” шарафини ҳимоя қилиб келмоқда.
