Суперлига 1-туридан ўрин олган "Навбаҳор" – "Динамо" (3:1) учрашувидан сўнг меҳмонлар бош мураббийи Вадим Абрамов ҳимоядаги камчиликлар, хатолар, рақиб ва чемпионат старти ҳақида фикр билдирди.
"Бугунги кўрсатган ўйинимиз умуман ёқмади. Бугун жамоамни майдонда умуман таний олмадим. Ҳимоячилар зарур бўлмаган вазиятларда хато қилишди. Рақибга гол уриш учун имкон бердик. Бундай рақиб билан ўйинда бундай хатолар қилиш ярамайди.
Негадир ҳимояга ётиб олдик. Ҳужумчиларимиз ҳужумда эмас орқада ўйнашди. Биринчи ўйин эканлиги учун ҳаяжонланишдими, билмайман. Рақиб бизга имкон бермади. Ҳимоячиларимиз дарвозамизга жуда яқинроқ ўйнашди ва ҳужумчиларимиз бунинг эвазига ортга қайтиб ўйнашга мажбур бўлишди. Бу ўзаро тушунмовчилик. Бугун Самарқанддан келиб бизни қўллаб-қувватлаган мухлислардан кечириб сўрайман. Улар биздан кўпроқ нарса кутишганди.
"Навбаҳор" ҳақида нима дейишим мумкин. Бугун бизни ютишдими, демак ҳозир улар биздан кучлироқ. Мавсум энди старт олди, башорат қила олмайман. Яна бир неча тур ўтса кейин фаворитлар ҳақида фикр билдириш мумкин.
Ўйингача муаммолар бор эди. Масалан, бразилиялик легионеримиз кутилмаганда жароҳат олиб қанчадир муддатга сафдан чиқди. Ўйин услубимизни у орқали қуриш борасида ишланмалар бор эди. Бу ҳам биз учун кутилмаган муаммо бўлди", - деди Абрамов.
