Олий лига 1-тури доирасида Бекободда кечган маҳаллий "Металлург" ва Ғузорнинг "Шўртан" клублари ўртасидаги кечган ўйиндан сўнг (1:0) мезбонлар бош мураббийи Рустам Мирсодиқов фикрлари билан ўртоқлашди.

— Бу ўйин ҳақида нима дейишим мумкин, жамоада олти йилдан буён фаолият кўрсатаётган бўлсам, биринчи марта мавсумнинг илк уй учрашувида ғалаба қозонмоқдамиз. Аввалги мавсумларнинг дастлабки уй ўйинлари биз учун ҳар доим муваффаққиятсиз тугаган. Йигитларга раҳмат, ноқулай об-ҳаво, шамолга қарамай яхши ўйин кўрсатишди.

Шамол иккала жамоага ҳам бир хил: биринчи бўлимда меҳмонларга ёрдам берган бўлса, иккинчи бўлимда бизга ёрдам берди (қаттиқ Бекобод шамоли биринчи бўлимда "Металлург" дарвозаси томон эсган бўлса, иккинчи бўлимда "Шўртан" дарвозаси томон эсди — std.uz.)

— Жамоангиздан бирор ўйинчини ажратиб кўрсата оласизми?
— Йўқ, ютуқ бутун жамоаники.

— Жамоангизнинг ўтган мавсумдаги тўпурари Шаҳзодбек Нурматов бугун майдонда кўринмади.
— Унинг жароҳати бор.

— Ўйинда ўтган мавсум асосан захирада ўтирган Норбеков, Сулаймонов каби ёш ўйинчилар майдонга тушди, улар ишончингизни шу қадар қозонишдими, тажрибали футболчилар туриб уларни майдонга туширингиз?
— Албатта, ишончимни қозонишди. Масалан, Шоҳназар Норбеков — Ўзбекистон ёшлар терма жамоасига номзод. Мен ўйлайманки, барча ўйинчилар бугун ўзларининг яхши томонларини кўрсатишди.

— Бундай ўйинларда битта гол барчасини ҳал қилади, деган фикрга қўшиласизми?
— Қўшиламан.

— Бу йил "Металлург" олдига бирон мақсад қўйилганми?
— Мақсад — мухлисларни хурсанд қилиш.

Рустам Сулаймонов ёзиб олди.