Гарчи «Шўртан» Бекободда кичик ҳисобда имкониятни бой берган бўлса-да, «оқ бўрилар» устози Эдгар Гесс ўйин борасидаги фикрлари билан ўртоқлашди.

— Эдгар Яковлевич, мавсумнинг биринчи расмий учрашуви борасида қандай фикрдасиз?
— Ўйин тўғрисида бир нарса дейишим қийин, чунки бугунги беллашувда рақибга қарши эмас, балки кучли эсган шамол билан баҳс олиб боришимизга тўғри келди. Шунга қарамай, ҳар иккала жамоа жисмоний курашни биринчи ўринга қўйган ҳолда тўп учун кураш олиб борди. Ўйлайманки, якуний натижа 0:0 ҳисоби билан тугаганда адолатли бўларди. Лекин ўйин тугашига кам вақт қолганда рақибнинг битта ҳужуми гол билан тугади.

— Бу учрашувда рақиб кучлилик қилдими?
— Бундай демаган бўлардим. Менинг назаримда, ҳар икки жамоа ҳам бир-бирига тенг қаршилик кўрсатди. Тўп киритилган вазиятда эса омад рақибга кулиб боқди.

— Энди «Шўртан» навбатдаги баҳсни ўз майдонида мамлакатимизнинг амалдаги чемпиони «Пахтакор»га қарши ўтказади. Бу ўйинга алоҳида тайёргарлик кўриладими?
— Йўқ. Биз чемпионатнинг ҳар бир учрашувига навбатдаги тур баҳси сифатида қараймиз ва шунга монанд одатдагидек тайёргарлик кўрамиз. Йигитларга бир кун дам берамиз ва душанба куни Ғузорда йиғилиб, «Пахтакор»га қарши тайёргарликни бошлаймиз.