Якшанба куни "Энфилд"да бизни АПЛда мавсумнинг энг марказий ўйинларидан бири кутиб турибди – "Манчестер Сити" сафарда "Ливерпуль"га қарши майдонга тушади. Ҳар икки жамоа учун муҳим бўлган ушбу жанг олдидан SportBible нашри ҳар икки жамоанинг икки етакчи ҳужумчиси - Эрлинг Холанд ва Дарвин Нуньеснинг статистик кўрсаткичларини солиштирди.

Иккаласи ҳам 2022 йилнинг ёзида Премьер-лигани забт этиш учун келган ва иккаласи учун ҳам жуда катта пул сарфланган. Норвегиялик футболчи ўтган мавсум барча турнирларда 52 та гол урди ва треблга эришди, уругвайлик эса бор-йўғи 15 та гол урди. Нуньес учун иккинчи мавсум анча муваффақиятлироқ ўтмоқда, чунки у ўтган йилги статистик натижаларини аллақачон такрорлади ва ҳали олдинда яна бир неча ой бор.

Аммо 2023/24 йилги мавсумда қайси форвард яхшироқ? Жавобни топиш учун биз Squawka'нинг Opta таққослаш статистикаларига мурожаат қилдик. Келинг, буни кўриб чиқамиз.

Нуньес жорий мавсумда Холанддан 3 та кўпроқ ўйин ўтказди - "шаҳарликлар" ҳужумчиси оёғидаги жароҳати сабаб узоқ вақтни майдон ташқарисида ўтказди. Лекин у пенальтидан ташқари гол ва голлар бўйича ўртача кўрсаткич, шунингдек, реализация (24,32% га 14,49%) ва зарбалар аниқлиги (90 дақиқа ичида 58,11% га 52,17%) бўйича уругвайлик ҳамкасбидан яхшироқ.

Норвегиялик футболчи яна тўп узатишлар аниқлиги, ҳаводаги курашларда муваффақият, шунингдек, офсайдда қолиш каби кўрсаткичлар бўйича ҳам етакчилик қилмоқда.

Нуньес ундан бор-йўғи беш кўрсаткич бўйича олдинда, энг диққатга сазоворлари - 90 дақиқадаги жами паслар, рақиб жарима майдончаси ичида тўпга умумий тегинишлар ва урилган ғалаба голи.

Эрлинг Холанд ушбу мавсумда Премьер-лигада 18 та гол урган, бу Нуньесдан 8 тага кўп. Уругвайлик футболчи, бир ўйинда ажойиб ҳаракат қилиши мумкин, аммо ҳозир унга барқарорлик етишмаяпти.