8 март, жума куни олий лигада "Пахтакор" 2-тур учрашувида майдонга тушади.

Унда тошкентликлар Ғузорда "Шўртан" меҳмони бўлади. Мазкур беллашувда бу йилдан "Пахтакор" таркибига қўшилган Александр Мерзляков ўзининг собиқ клубига қарши майдонга тушиши мумкин.

Ғузорликлар ҳақида тўхталадиган бўлсак, жамоани кўплаб футболчилар тарк этишди. Эдгар Гесс эса ўша йўқотишларнинг ўрнини тўлдиришга ҳаракат қилди. Таркибга ўн нафар атрофида янги ўйинчилар таклиф этилди. Биринчи турда Бекободда "Металлург" билан ўйинда 0:1 ҳисобида имкониятни бой берган қуйидаги таркибда ҳаракат қилишди:
Леус, Отахонов, Крушельницкий, Алиқулов, Фоменко, Соломин, Жўрабоев, Пономарёв, Абибуллаев, Востриков (Аббос Омонов, 70), Қодирқулов (Райимқулов, 46).
 
Ҳозирга қадар жамоалар олий лигада 16 марта тўқнаш келганлар. Уларнинг 14тасида "Пахтакор" зафар қучган, битта баҳсда дуранг, яна бирида ғузорликларнинг муваффақияти кузатилган. Гол уриш борасида пахтакорчилар яққол устун, 45-8. "Пахтакор"нинг энг йирик ғалабаси 6:0, "Шўртан"ники 3:1. Ўтган йилги ўйинларда Ғузорда мезбонлар 3:1 ҳисобида ғалаба қозонишган, Тошкентда эса ҳисоб очилмаган.
 
Ёшлар таркиблари беллашуви 7 март куни соат 16:00да, асосий таркиблар баҳси 8 март куни соат 16:00да бошланади. "Пахтакор"нинг асосий таркиби кўк рангли футболкаларда майдонга тушади. Ўйинни бевосита стадиондан кузатиш учун жамоамиз мухлислар клубидан 50 нафар ишқибознинг Ғузорга етиб бориши кутилмоқда.
 
Олий лига. 2-тур.
«Шўртан» – «Пахтакор»
Ҳакамлар: Равшан Эрматов (Тошкент), Абдулҳамид Расулов (Тошкент), Жаҳонгир Саидов (Тошкент), Николай Мешков (Самарқанд).
Назоратчи: Радик Серазетдинов (Тошкент).