Каталониянинг "Барселона" клуби спорт директори Деку ижарага олинган икки футболчи - ҳужумчи Жоау Феликс ва ўнг қанот ҳимоячиси Жоау Канселунинг келажаги ҳақидаги тахминлари билан ўртоқлашди.
"Феликс ва Канселуни ўзимизда сақлаб қоламизми? Биз уларни сақлаб қолмоқчимиз, лекин кўп нарса вазиятга боғлиқ бўлади", - дея Деку сўзларини келтирмоқда Barca Universal.
Эслатиб ўтамиз, Феликс “Атлетико Мадрид”га, Канселу эса “Манчестер Сити”га тегишли. Иккала клуб ҳам футболчиларни ёзда доимий равишда сотмоқчи, аммо молиявий муаммолар туфайли "Барселона" керакли пулни тўлай олмаяпти. Миш-мишларга кўра, Каталония клуби Канселу ва Феликснинг ижара муддатини яна бир мавсумга узайтирмоқчи.
