"Манчестер Юнайтед" ярим ҳимоячиси Кобби Майну Англия терма жамоасидаги илк ўйинидан сўнг ўзини қандай ҳис қилганини айтиб берди.

18 ёшли футболчи шанба куни "Уэмбли"да бўлиб ўтган Бразилияга қарши ўртоқлик ўйинида дебют қилди. “Қизил иблислар” ярим ҳимоячиси 75-дақиқада захирадан майдонга тушди, бироқ у Гарет Саутгейт жамоасига минимал мағлубиятдан қутулиб қолишга ёрдам бермади – ягона гол 80-дақиқада Эндрик томонидан киритилди.

“Уэмбли"да, оилам олдида Англия терма жамоаси сафида дебют қилишим алоҳида туйғу. Мен ҳеч қачон бу лаҳзани унутмайман. Энди ўзимизга келиб, сешанба кунги ўйинга тайёргарлик кўришимиз керак", - деб ёзди Майну ижтимоий тармоқларда.

26 март куни Англия терма жамоаси Бельгияга қарши баҳс олиб боради.