Футбол бўйича Ўзбекистон терма жамоаси ЖЧ—2026 саралаши доирасида Гонгконгга қарши баҳс олиб боради. Учрашув 26-март куни “Бунёдкор” стадионида бўлиб ўтади.

Ўйин олдидан Ўзбекистон терма жамоаси ёрдамчи мураббийи Владо Радманович матбуот анжуманида иштирок этди.

"Биз барчамиз терма жамоага ишонамиз, бутун ўзбек халқи ҳам жамоага ишонади. Эртага керакли натижа учун қўлимиздан келган барча ишни амалга оширишга ҳаракат қиламиз.

Биринчи ўйинда яхши ўйин кўрсата олдик, умид қиламанки, эртага ҳам ғалаба қозонамиз. Рақибларимизни ҳурмат қиламиз. Хавотир йўқ, лекин беписандлик билан ёндашишимиз ҳам мумкинмас.

Бизда қисқа муддат ичида бир жамоага қарши ўйнаш тажрибаси бўлмаганди. Лекин мотивацияга боғлиқ ҳаммаси. Бироқ мотивация керагидан ортиқ бўлса қўшимча босим ҳам бўлиши мумкин. Меъёрида керак бўлади.

Албатта, биз Катанес билан доимий алоқадамиз. Кетишидан олдин ҳам ўйинни ташкил этиш юзасидан гаплашиб олгандик. Эртага ҳам тўлиқ алоқада бўлиб, маслаҳатлашиб турамиз.

4 та ҳимоячи ёки 5 та ҳимоячи билан ўйнашда қанот футболчиларининг функцияси бироз бошқачароқ. Бизнинг режага кўра, Азиз ҳимояда ҳам, ҳужумда ҳам, ярим ҳимояда ҳам фаол иштирок этади.

Эртага бош мураббий билан қандай тактикада ўйнаш ҳақида гаплашиб оламиз", деди Владо Радманович.