Майк Меньян "Милан" билан шартномаси узайтирилса, маошини оширишни сўрамоқда.
La Gazette dello sport хабарига кўра, дарвозабон йилига камида 7 миллион евро маош олмоқчи, бу эса уни Рафаэль Леау билан бирга жамоанинг энг кўп маош олувчи футболчисига айлантиради. Франциялик футболчи ҳозирда 3,2 миллион евро маош олади ва унинг амалдаги шартномаси 2026 йилнинг июнида якунига етади.
Қайд этилишича, Меньян билан шартномани узайтириш бўйича музокаралар ҳали якуний босқичга етмаган, бироқ келишувга эришиш осон бўлмайди. Клуб иш ҳақи фондини назорат қилиш ниятида ва Леауни "ягона истисно" сифатида кўрмоқда. Португалиялик вингер 5-6 миллион евро маош олади, бу эса унга бонуслар билан бирга мавсумда 7 миллион маош беради.
Бундан ташқари, "Милан" ўзини хавф остига қўйиб, Меньянни эркин агент сифатида қўйиб юборишни истамайди, худди аввалги дарвозабон Жанлуижи Доннарумма билан бўлгани каби.
Шу тариқа, келишувга эришилмаса, клуб шу ёзда дарвозабоннинг трансфери бўйича таклифларни кўриб чиқиши мумкин. 28 ёшли дарвозабонни сотиб олишга даъвогарлардан бири "Бавария" ҳисобланади.
