Якшанба куни Муҳаммад Салоҳ ва Юрген Клопп "Ливерпуль"нинг "Вест Хэм"га қарши ўйинида баҳслашиб қолишди. Ўйиндан сўнг мисрлик ўзининг "Агар бу ҳақда гапирсам, ёнғин чиқади" деган ибораси билан оловга ёғ қуйди.
The Sun нашрининг ёзишича, Клопп футболчилар билан мулоқотга жуда катта эътибор беради. Немис мутахассисиси захирадан майдонга тушишидан олдин ҳар бир футболчи билан қўл бериб кўришади, бироқ Салоҳ буни рад этди. Эҳтимол, мисрликнинг бу позицияси мураббийнинг сўнгги пайтларда ўйин вақтини чеклаб қўйгани билан боғлиқдир. Жанжалга айнан Салоҳнинг қўл бериб кўришишдан бош тортгани сабаб бўлган.
"Ўйиндан сўнг футболчиларга бир неча кунлик дам берилди, улар сешанба куни йиғилишади. Умид қиламанки, бу вақтгача кескинлик пасаяди", - деди клубдаги манба.
Эслатиб ўтамиз, “Вест Хэм” ва “Ливерпуль” 2:2 ҳисобида дуранг ўйнаганди.