Марко Ройс мавсум охирида "Интер Майами" ёки "Ан-Наср"га ўтиши мумкин.
34 ёшли ярим ҳимоячи мавсум охирида Дортмундни эркин агент сифатида тарк этади. "Реал"га қарши Чемпионлар лигаси финали Ройснинг "Боруссия" учун сўнгги расмий ўйини бўлади.
Sky Sports хабарига кўра, германиялик ярим ҳимоячи АҚШ, Саудия Арабистони, Қатар ва Туркиядан бир нечта сўровлар олган. Ройсга қизиқиш билдираётган клублар орасида Лионель Месси тўп сурадиган "Интер Майами" ҳамда Криштиану Роналду тўп сурадиган "Ан-Наср" клублари бор.
Аввалроқ футболчи "Сент-Луис Сити" билан дастлабки музокаралар олиб боргани хабар қилинганди.
"Боруссия" билан Ройс икки марта Германия кубогини қўлга киритди.
Умуман олганда, Марко шу пайтгача жамоа сафида 424 та ўйинда 168 та гол урган ва 128 та голли узатмани амалга оширган.
