Кечаги ўйиндан кейин айниқса, Фил Фоденнинг «Олтин тўп»га муносиб экани ҳақидаги мулоҳазалар кўпайди.

Филнинг албатта, муносиб эканини тан олган ҳолда, амалда бу имконсиз эканини айтмоқчиман.

«Олтин тўп» мантиғи қандай ишлашига эътибор берсангиз, ё гол+пас бўйича ўта юқори кўрсаткичларни қайд этиш керак ёки маълум бир «скилл» (қобилият) бўйича ҳеч бўлмаса жамоасида яққол устун бўлиши катта аҳамият касб этади. Бу футболчининг чиндан ҳам элита, такрорланмас маҳорат соҳиби эканини кўрсатади.

Шубҳасиз, Фил Фоден натижаларга бўлган таъсири, барқарорлиги ва ҳаракатчанлиги нуқтаи назаридан «Сити»да мавсумнинг энг яхши ўйинчиси, аммо қаранг, шу жамоа ичида ҳам Ҳоланд ундан яхшироқ гол уради, Кевин де Брюйне яхшироқ пас беради, Родри ўйинни бошқариш бўйича Фодендан устун, ҳа, Ортега ҳам дарвозани Фодендан яхшироқ қўриқлайди. Ишонаверинг, бу жуда муҳим.

Иньеста 2010 йилда «Олтин тўп»ни ололмаганда, ҳамма норози бўлган, лекин дриблингда Месси, пас беришда Хави туриб, Иньестани танлаш бироз қийин. Ростанам энг яхши бўлиш учун шунчаки яхшироқ ўйнаш етарли бўлмайди, қайсидир жиҳатда умуман энг қобилиятли бўлиш ҳам керак, назаримда.