"Интер" ҳужумчи Лаутаро Мартинес билан янги шартнома шартлари бўйича келиша олмаяпти.

"Нерадзуррилар" раҳбарияти сардор билан янги мавсум бошлангунга қадар келишувга эришишга умид қилмоқда, аммо бу осон бўлмайди - ҳозирча томонлар келишувга эришишдан йироқ. Журналист Фабрицио Бязиннинг ёзишича, клуб яқин вақт ичида Мартинеснинг агентидан аниқ жавоб олишни кутмоқда. Агар 26 ёшли аргентиналик ҳали ҳам муросага рози бўлмаса, келажакда уни текинга йўқотмаслик учун "Интер" уни катта эҳтимол билан сотувга қўяди.

Лаутаро Мартинеснинг амалдаги шартномаси 2026 йилгача мўлжалланган. Transfermarkt портали маълумотларига кўра, футболчининг нархи 110 миллион еврони ташкил қилади.