Чехия терма жамоаси бош мураббийи Иван Гашек жамоасининг мағлубияти табиий эканлигини тан олди. Чехлар 62-дақиқада Лукас Проводнинг голи эвазига ҳисобда олдинга чиқиб олишганди, бироқ 67-дақиқадаги Робин Граначнинг автоголи ва қўшимча дақиқаларда Франсишку Консейсаунинг аниқ зарбаси португалияликларга 3 очко келтирди.
“Биз очко олишга жуда яқин бўлсак-да, ишимизни тугатмаганимиз ачинарли. Биз дунёнинг энг кучли жамоаларидан бирининг вазиятини жуда қийинлаштирдик.
Охирида ҳал қилувчи голни ўтказиб юбориш уят, лекин биз буни имкон қадар тезроқ унутишимиз керак - тўрт кундан кейин бизни Грузияга қарши асосий ўйин кутиб турибди.
Тўпни ўзимизда сақлолмадик, рақиб бизни кўп ҳимояланишга мажбур қилди. Португалия яхшироқ эди ва ғалабага ҳақли эди, аммо мен футболчиларимга саъй-ҳаракатлари учун раҳмат айтмоқчиман", - дея Гашек сўзларидан иқтибос келтиради УЕФА матбуот хизмати.
