Польша терма жамоаси сардори ва ҳужумчиси Роберт Левандовски 2024 йилги Европа чемпионати гуруҳ босқичининг 2-турида Австрияга қарши ўйиндаги мағлубият ҳақида гапирди. Польшаликлар австрияликларга 1:3 ҳисобида имкониятни бой беришди. Левандовскининг ўзи 60-дақиқада захирадан майдонга тушди.

"Асосий таркибда ўйнаб, терма жамоага катта ёрдам берган бўлишим даргумон. Иккинчи бўлимга кириш ва асосий таркибда бўлиш икки хил нарса. Мени энг кўп ғазаблантираётгани мана шу ожизлик, менда шундай имконият бўлганида ҳам терма жамоага кўп ёрдам бера олмаслигимни англаш", - деди Левандовски УЕФА матбуот хизматига.

Эслатиб ўтамиз, Польша терма жамоаси Евро-2024 гуруҳ босқичидаги иккита ўйиндан сўнг бирорта ҳам очко ололмади ва якунига бир тур қолганида турнирнинг плей-офф босқичига йўлланма олиш имкониятидан маҳрум бўлди.