Дортмунднинг "Боруссия" клуби "Манчестер Сити" ҳимоячисини сотиб олишни мақсад қилган. Гап ўтган мавсумда "Жирона"да ижарада ўйнаган Ян Коуто ҳақида кетмоқда.
Журналист Патрик Бергернинг хабарига кўра, Дортмунд клуби футболчининг атрофидагилар билан музокараларни бошлаган. Маълум қилинишича, Коутонинг ўзи ҳам Нури Шахин жамоасига ўтишга тайёр.
Манбанинг қўшимча қилишича, немис клуби "Манчестер Сити" билан шартномаси бир йилдан кейин тугайдиган Коутонинг трансфери учун 20-25 миллион тўлаши керак. 22 ёшли Ян Испания чемпионатининг сўнгги мавсумида битта гол урди ва саккизта голли узатмани амалга оширди.
