Бокс бўйича Рио-2016 ёзги Олимпия ўйинлари чемпиони Ҳасанбой Дўсматов (-51 кг) ҳам Париж-2024 даги муваффақиятли иштирокини давом эттирган ҳолда ярим финалга йўл олди. Ҳамюртимиз чорак финалда ўзининг азалий рақибларидан бири қозоғистонлик Сакен Бибоссиновни мағлубиятга учратиб, ўзининг Олимпиадалардаги иккинчи медалини кафолатлади.

Биринчи раунд тенгма-тенг курашлар остида кечди ва ҳакамларнинг 3 нафари устунликни қозоқ боксчисига беришди.

Иккинчи бўлимда Ҳасанбой ранг-барангликни оширди ва кичик устунликка эга бўлди. Бу сафар рефериларнинг 3 нафари Дўсматовнинг ғалабасини қайд этди. Натижада сўнгги бўлим олдидан ҳисоб тенглашди.

Тиниб-тинчимас Дўсматов сўнгги 3 дақиқаликда аниқ зарбалари эвазига Сакенни қийин аҳволга солиб қўйди ҳамда барча ҳакамларнинг овозини ўзига оғдирди. Якуний баҳолар — 3:2 (30-27, 29-28, 29-28, 28-29, 28-29).

Ҳасанбой Дўсматов ярим финалга йўл олди! Кейинги баҳс 4 август куни финал учун Кабо-Верде вакили Давид Де Пинага қарши бўлиб ўтади.