"Нефтчи"га қарши учрашув якунлангач, қаршиликлар устози ўйин ҳақидаги фикрлари билан ўртоқлашди.

— Бугун ҳар иккала жамоа аъзолари ютуқ учун ҳаракат қилишди, — дея гап бошлади Рўзиқул Саъдуллаевич. — Биз ўйин оғир кечишини билардик. Чунки мезбонларни кетма-кет тўртта мағлубиятдан кейин бугунги ўйинда фақат ютуқдан бошқаси қониқтирмасди. Қолаверса ҳаммага маълум: “Нефтчи” ўз майдонида рақиб ким бўлишидан қатъий назар анча шижоаткор ўйин кўрсатади. Бугун ҳам бу амалда ўз исботини топди. Ўйиннинг бошини футболчиларимиз жуда суст бошлашди. Бўлим ўрталарига келиб бизда ҳам бир қатор имкониятлар бўлди. Лекин Зоҳид Абдуллаевнинг кутилмаганда иккита сариқ карточка олиб майдонни тарк этиши режаларимизга бироз таъсир кўрсатди. Иккинчи бўлимда ҳисобда ортда қолаётганлари ва бир киши кам бўлиш ўйнашларига қарамай, йигитларимиз характер кўрсатишди ва рақиб дарвозасини ишғол этишнинг уддасидан чиқишди. “Нефтчи”га қарши 60 дақиқа 10  киши бўлиб ўйнаш осон эмас. Шу боис бугунги натижадан қониқиш ҳосил қилдим, десам ҳам бўлади.

— Дуранг ниманинг ҳисобига эришилди, деб ҳисоблайсиз?
— Асосий эътиборни ҳужумга қаратиб, Геворкян ва Гадоевни кўпроқ олдинга ўтишларини таъкидладим. Ўйиннинг катта қисмини орқа чизиқда уч ҳимоячи ҳаракат қилди. Энг муҳими йигитлар ўз кучларига ишониб тўп тепишди ва рақиб дарвозасини ишғол этишни уддалашди.

— Биринчи бўлимда Алишер Юсупов жароҳат олиб майдонни тарк этди. Унинг жароҳати қай даражада жиддий?
— Умид қиламанки, у кейинги ўйинлардан бошлаб яна жамоага ёрдам беради. Жароҳати у қадар жиддий эмас.