Ҳуқуқлари "Челси"га тегишли бўлган сербиялик "Страсбург" дарвозабони Жорже Петрович ижара муддати тугагач, Лондон клубига қайтганидан сўнг, "кўклар"нинг асосий дарвозабони бўлиш ниятида эканлигини маълум қилди.
"Менинг мақсадим - "Челси"да доимий биринчи рақамли футболчига айланиш. Бу дунёнинг энг яхши жамоаларидан бири ва умид қиламанки, бу содир бўлади", - деди Петрович.
Ўтган мавсумда 24 ёшли дарвозабон "Челси" сафида барча турнирлар доирасида 31та ўйин ўтказиб, 7та учрашувда дарвозаси дахлсизлигини сақлаб қолган ҳолда 44та гол ўтказиб юборган. Бу мавсумда Петрович Лига 1да "Страсбург"нинг 3 та учрашувида 4 та гол ўтказиб юборди.
