"Атлетико Мадрид" ҳужумчиси Хулиан Альварес унчалик ишончли бўлмаган стартдан кейин ажойиб ўйин кўрсатмоқда.
Пайшанба куни "матрасчилар" Испания кубогида "Вик"ни аргентиналикнинг дубли эвазига мағлуб этишди - у 81 ва 89-дақиқаларда гол урди.
Шу тариқа, 24 ёшли футболчи "Атлетико" сафида барча мусобақаларда ўтказган сўнгги бешта ўйинида бешта голда иштирок этди. Олдинроқ форвард "Реал Сосьедад" дарвозасига гол урган (1:1), "Леганес" билан учрашувда (3:1) ассистентлик қилган, шунингдек, "Лилль" билан мағлуб бўлган Чемпионлар лигаси ўйинида (1:3) гол урган. Бу даврда "Манчестер Сити"нинг собиқ футболчиси фақатгина "Бетис" (0:1) билан ўйинда ўзини кўрсата олмаганди.
Умуман олганда, Хулиан Альварес Диего Симеоне жамоасида 15 ўйинда 6 та гол ва 1 та голли узатмага эга.
