30 ноябрь куни Наманганда “Навбаҳор”га қарши чемпионатнинг сўнгги ўйинида майдонга тушган "Андижон" аъзолари эндиликда қишки таътилга чиқдилар.
Клуб матбуот хизмати жорий мавсумда 60 йиллик юбилейида илк бор Ўзбекистон Кубогини қўлга киритган ва миллий чемпионатда 9-ўринни банд қилган “Андижон”нинг иштирокини шубҳасиз муваффақиятли баҳолайди. Кубок соҳиби сифатида “Бургутлар” 2025 йилда ўз тарихида илк бор Осиё Чемпионлар лигаси 2да иштирок этади. Бу эса ўз-ўзидан янги футбол мавсуми жамоа учун ниҳоятда муҳим эканлигини кўрсатиб турибди.
Жуда машаққатли ўтган мавсумдан кейин жамоамиз аъзолари яхшилаб хордиқ чиқаришади. Янги мавсумга жиддий ва муносиб тайёргарлик кўриш долзарб масала ҳисобланади. Бу борада клуб раҳбарияти қишки тайёргарлик режаларини ишлаб чиқишган.
Айтиш мумкинки, “Андижон” жамоаси декабрь ойида дам олади. 2025 йилги мавсумга тайёргарликни эса 3 январь санасидан бошлаши кўзда тутилган. Айнан қишки йиғин мобайнида бир нечта босқичдан иборат режалар ишлаб чиқилган бўлиб, унга кўра, “Бургутлар” Тожикистон ҳамда Туркияда ўқув-машғулот йиғинларини ўтказиши режалаштирилган.
Шунингдек, мухлисларни таркибда қандай ўзгаришлар бўлиши ҳам қизиқтирмоқда. Юқорида таъкидлаб ўтилганидек, келаси йил жамоа учун жуда муҳим ва янги саҳифа очиладиган мавсум ҳисобланади. Шу нуқтаи назардан олиб қараганда, қишки селекцияда жамоа фаол бўлади ва айтиш жоизки, қизиқарли трансфер янгиликлари ишқибозларни кутмоқда. Ҳар бир позицияни янада кучайтириш мақсадида янги футболчилар билан қизғин музокаралар давом этмоқда ва уларнинг орасида яхши савиядаги легионер ўйинчилар ҳам мавжуд. Келишувга эришилган футболчилар ҳақида албатта клуб матбуот хизмати орқали расмий маълумот берилади.
