30 noyabr kuni Namanganda “Navbahor”ga qarshi chempionatning so‘nggi o‘yinida maydonga tushgan "Andijon" a’zolari endilikda qishki ta’tilga chiqdilar.

Klub matbuot xizmati joriy mavsumda 60 yillik yubileyida ilk bor O‘zbekiston Kubogini qo‘lga kiritgan va milliy chempionatda 9-o‘rinni band qilgan “Andijon”ning ishtirokini shubhasiz muvaffaqiyatli baholaydi. Kubok sohibi sifatida “Burgutlar” 2025 yilda o‘z tarixida ilk bor Osiyo Chempionlar ligasi 2da ishtirok etadi. Bu esa o‘z-o‘zidan yangi futbol mavsumi jamoa uchun nihoyatda muhim ekanligini ko‘rsatib turibdi.

Juda mashaqqatli o‘tgan mavsumdan keyin jamoamiz a’zolari yaxshilab xordiq chiqarishadi. Yangi mavsumga jiddiy va munosib tayyorgarlik ko‘rish dolzarb masala hisoblanadi. Bu borada klub rahbariyati qishki tayyorgarlik rejalarini ishlab chiqishgan.

Aytish mumkinki, “Andijon” jamoasi dekabr oyida dam oladi. 2025 yilgi mavsumga tayyorgarlikni esa 3 yanvar sanasidan boshlashi ko‘zda tutilgan. Aynan qishki yig‘in mobaynida bir nechta bosqichdan iborat rejalar ishlab chiqilgan bo‘lib, unga ko‘ra, “Burgutlar” Tojikiston hamda Turkiyada o‘quv-mashg‘ulot yig‘inlarini o‘tkazishi rejalashtirilgan.

Shuningdek, muxlislarni tarkibda qanday o‘zgarishlar bo‘lishi ham qiziqtirmoqda. Yuqorida ta’kidlab o‘tilganidek, kelasi yil jamoa uchun juda muhim va yangi sahifa ochiladigan mavsum hisoblanadi. Shu nuqtai nazardan olib qaraganda, qishki seleksiyada jamoa faol bo‘ladi va aytish joizki, qiziqarli transfer yangiliklari ishqibozlarni kutmoqda. Har bir pozisiyani yanada kuchaytirish maqsadida yangi futbolchilar bilan qizg‘in muzokaralar davom etmoqda va ularning orasida yaxshi saviyadagi legioner o‘yinchilar ham mavjud. Kelishuvga erishilgan futbolchilar haqida albatta klub matbuot xizmati orqali rasmiy ma’lumot beriladi.