"Милан"нинг чап қанот ҳимоячиси Тео Эрнандес фаолиятини "Реал"да давом эттириши мумкин. Бу ҳақда TEAMtalk хабар бермоқда.
Манбага кўра, "Реал" ўнг қанот ҳимоячиси позициясидан ташқари ҳимоянинг чап қанотини ҳам кучайтирмоқчи. Таъкидланишича, 27 ёшли Эрнандес кучайиш вариантларидан бири ҳисобланади. "Милан" франциялик футболчи билан шартномани узайтиришни муҳокама қилмоқда, бироқ клуб муносиб таклиф бўлса, ўз футболчисини қўйиб юборишга тайёр, дея таъкидлади манба.
2019 йилда "Милан" Эрнандесни "Реал"дан 22,8 миллион евро эвазига сотиб олганди. Жорий мавсумда ҳимоячи барча мусобақаларда 19 та ўйинда майдонга тушиб, 2 та гол урди ва 2 та голли узатмани амалга оширди.
