Бу йилги мавсумда «Андижон»нинг кашфиёт футболчиси сифатида 20 ёшли иқтидорли ҳужумчи Рустам Турдимуродовни айтиш мумкин.

У бу йил Суперлигада дебютини ўтказди. Шунга яраша голлари ҳисобини ҳам очди ва якунда «Андижон»нинг энг яхши тўпурарига айланди.

Турдимуродов ҳаммаси бўлиб 9 та гол муаллифига айланди. Рустам чемпионат якуни бўйича «Андижон» матбуот хизматига интервью берди.

— Рустам, якунига етган биринчилик жамоа ва сиз учун ҳам ўзгача ўтди. Мавсум аввалида нимани кўзлагандингиз? Умуман, қандай таассурот қолди?

— Бу йил мен учун энг яхши йил бўлди, деб айта оламан. Мавсум аввалида шу жамоани бир бўлаги бўлиб ёрдам бершни мақсад қилгандим. Таассуротлар жуда зўр. Кубок соҳибига айландик, йилни яхши кайфиятда тугатдик.

— Сиз бу йил Суперлигада дебют голингизни уришдан ташқари, жамоанинг энг яхши тўпурари бўлдингиз. Ҳаммаси бўлиб 9 та гол урдингиз. Кутганмидингиз?

— Ҳа, бу йил ўзимни дебют голимни урдим, Худога шукр. Агентим билан келишган эдик, 10 та голга. Кутмагандим, чунки дебют йилда 10 та гол уриш кўп, лекин ҳаракат қилдим, 1 та гол етмай қолди.

— Бундай сермаҳсулликнинг асосий сабаби нимада?

— Асосий сабаби мураббийларни ёрдамида, деб ўйлайман ва Беларуснинг «Энергетик» жамоасида ҳужумчи сифатида кўп нарса ўргандим.

— Бундай ёқимли саргузаштга бой ўтган мавсумдан сўнг қандай хордиқ чиқаряпсиз?

— Йил бўйи футбол ичида бўлдим. Тўғриси, оиламга кўп вақт ажрата олмадим. Ҳозирда оила даврасидаман. Бу йилги хотираларни ёдга олиб хордиқ чиқармоқдамиз.

— 9 та голингиз орасида сиз учун чирой бўйича биринчи ўринда қайси бири?

— Энг чиройлиси «Қизилқум»га қарши учрашувда киритган голим деб ўйлайман. Узоқ масофадан тўп киритдим ва дадам яхши кўрган услубда урдим.

— Мухлислар учун нима деган бўлардингиз?

— Барча мухлисларга раҳмат. Бу йил анча сермаҳсул ўтди, «Андижон» учун. Худо хоҳласа, ОЧЛда «ёндирамиз», деган бўлардим.

—  Футболдаги кумирингиз ким ва кимга ўхшашни истайсиз?

— Кумирим Роналдо. Дадам кўпинча Сон Хён Миндан ўрнак олишимни айтади.