Теннис бўйича «Улкан тож» туркумига кирувчи «Ролан Гаррос» турнирида иштирок этаётган Денис Истомин биринчи босқични муваффақиятли якунлади.

Ўзбекистонлик теннисчи турнирнинг 28-сараланган спортчиси германиялик Флориан Майерга қарши учрашувда ғалаба қозониб кейинги босқич йўлланмасини қўлга киритди.

Денис аввалига биринчи сетда 4:6 ҳисобида имкониятни бой берганди. Бироқ кейинги икки сет ҳамюртимизнинг 6:3/7:5 ҳисобларида ғалабаси билан якунига етди. Тўртинчи сет бошланиши арафасида эса Майер жароҳати безовта қилган шекилли учрашувни давом эттира олмаслигини билдирди ва натижада Истомин 1 соат 43 дақиқа давом этган курашда ғалабани ўз томонига оғдира олди.

Энди Истомин иккинчи даврада россиялик Николай Давиденкога қарши кортга чиқади. Давиденко биринчи босқичда франциялик Флоран Серрани уч сетда 6/3, 6/4, 7/5 ҳисобларида мағлубиятга учратганди.