Буюк Британия ташқи ишлар вазири Дэвид Лэмми “Челси”ни сотишдан тушган 2,3 миллиард фунт стерлинг миқдоридаги музлатилган маблағни Украинага ёрдам бериш учун ишлатмоқчи, деб ёзади Тhe Financial Times.
“Тўғри – пулни тақсимлаш керак, ундан фойдаланиш керак”, деб Лэммининг сўзларини келтиради манба.
Пул икки йилдан бери махсус ишончли банк ҳисобварағида турибди, бироқ унинг қандай ишлатилиши ҳақида гап-сўз ҳалигача давом этмоқда.
Вазирнинг таъкидлашича, у суд йўлидан боришни истамайди, чунки бу кўп вақт талаб этади, аммо бу вариант ҳам муҳокама қилинмоқда.
Буюк Британия ҳукумати пулларни Украина ичида сарфлаш кераклигини таъкидламоқда, жамғарма маблағларни қочқинларни қўллаб-қувватлаш учун ишлатишни таклиф қилмоқда.
Эслатиб ўтамиз, Буюк Британия "Челси"нинг собиқ хўжайини Роман Абрамовичга қарши 2022 йилнинг март ойида санкциялар киритган, шу боис унинг 2,5 миллиард фунт стерлинглик улуши музлатилган.
Ўз навбатида, Буюк Британия ҳукумати Украинага гуманитар ёрдам учун маблағ жўнатиш ғоясини 2023 йилнинг январида эълон қилган эди.
