Ички Мўғулистондаги об-ҳаво қийинчиликлари сабаб футбол бўйича Ўзбекистон миллий терма жамоаси Хоххотдаги «Байта» халқаро аэропортидан Пекинга уча олмади. Бу ҳақда, 7 июнь, жума куни Ўзбекистон футбол федерацияси матбуот котиби Санжар Ризаев ўз твиттерида маълум қилди.

ЎФФ матбуот котибининг қайд этишича, миллий терма жамоа қачон Пекинга учиб кетиши ҳозирча номаълум. Миллий терма жамоа Пекиндан сўнг Жанубий Кореяга йўл олади.

Ўзбекистон миллий термаси Хитойнинг мухтор вилоятларидан бири – Ички Мўғулистон маъмурий маркази ҳисобланган Хоххот шаҳрига футбол бўйича Хитой миллий терма жамоасига қарши ўртоқлик учрашувини майдонга тушиш учун келганди. 6 июнь куни бўлиб ўтган халқаро ўртоқлик учрашувида Миржалол Қосимов шогирдлари 2:1 ҳисобида ғалаба қозонишди. Қайд этиш жоиз, футбол учрашуви вақтида ҳам тинмай ёмғир ёғиб турган эди.

Ўзбекистон миллий терма жамоаси айни вақтда 2014 йилги жаҳон чемпионатига тўғридан-тўғри йўлланмани қўлга киритишга яқин турибди. Миржалол Қосимов шогирдлари 11 июнь куни Жанубий Кореяга қарши, 18 июнь куни Қатар терма жамоасига қарши ЖЧ-2014 саралаш 4-босқич «А» гуруҳи учрашувларида майдонга тушишади. Ушбу учрашувлардаги ғалабали натижалар миллий терма жамоага ўз тарихида илк бор жаҳон чемпионати йўлланмасини қўлга киритиш имконини беради.