"Вест Хэм"нинг ҳимоячи ярим ҳимоячиси Эдсон Альварес фаолиятини Англия Премьер-лигасининг бошқа клубида давом эттириши мумкин. Бу ҳақда Todofichajes портали саҳифаларида хабар берилди.
Манбага кўра, 27 ёшли мексикалик футболчини ўз сафига қўшиб олишга Лондоннинг "Челси" клуби қизиқмоқда. Альвареснинг трансфер нархи 30 миллион еврога баҳоланмоқда ва унинг "болғачилар" билан шартномаси 2028 йилнинг ўрталарига қадар амал қилади.
Англия чемпионатининг жорий мавсумида ярим ҳимоячи 23 та учрашувда иштирок этди. Альварес битта голли узатмани амалга оширди, олтита сариқ карточка олди ва бир марта майдондан четлатилди.
