“Манчестер Сити” ҳужумчиси Эрлинг Ҳоланд Англия кубоги чорак финал босқичидаги “Борнмут” (2:1) учрашувида олган жароҳати сабаб ушбу мавсум охиригача сафдан чиқди. Бу ҳақида клуб матбуот хизмати маълум қилди.

Норвегиялик футболчи 30 март куни бўлиб ўтган ўйинда гол уришни уддалади, бироқ жароҳат сабаб 61-дақиқада алмаштирилди ва стадионни қўлтиқтаёқ билан тарк этди. Клуб унинг жароҳати бўйича дастлабки хулосаларни маълум қилди.

"Эрлинг Ҳоланд чап тўпиғидан жароҳат олди. У Манчестердаги шифохонада дастлабки тиббий текширувдан ўтди ва ҳозирда жароҳатнинг тўлиқ даражасини аниқлаш учун қайта кўрикдан ўтмоқда. Бироқ Эрлинг жорий мавсум охирида майдонга қайтиши ва ёзда ўтказиладиган Клублар ўртасидаги Жаҳон чемпионатида иштирок этишини маълум қиламиз", дейилади хабарда.

Маълумот учун, 24 ёшли ҳужумчи жорий мавсум барча мусобақалар доирасида 40 ўйинда майдонга тушиб, 30 та гол ва 4 та голли узатма муаллифига айланди.