"Челси"нинг ҳужумкор ярим ҳимоячиси Коул Палмер узоқ вақтдан бери биринчи марта голда бевосита қатнашди.

22 ёшли футболчи кечаги “Тоттенхэм”га қарши ўйиннинг 50-дақиқасида Энцо Фернандесга голли пас берди.

Бу англиялик футболчининг ўтган йилнинг 1 декабридан бери тўрт ойдан кўпроқ вақт ичида биринчи голли узатмаси бўлди.

Машҳур мураббий Тим Шервуд Энцо ҳамда Палмер ҳақида гапирди. 

"Энцо Фернандес ўз ўрнини ўзгартирди. У орқага қайтиб, рақибга гол таҳдидини юзага келтирди. У ўз салоҳиятини рўёбга чиқармоқда. Келажакда жамоа унинг атрофида қурилади.

Биз Палмер ва Фернандесни "шпорлар"га қарши ўйинда ғалабанинг муҳим калити сифатида кўрдик. "Челси" лойиҳасининг олға силжишида улар муҳим роль ўйнайди", – деди Шервуд.