Миланнинг "Интер" клуби дарвозабони Янн Зоммер "Бавария" сафида жароҳат олган Мануэль Нойер ўрнига майдонга тушадиган Йонас Урбигнинг ўйинидан олган таассуротлари билан ўртоқлашди.
21 ёшли футболчи мюнхенликлар сафига январь ойида "Кёльн"дан келиб қўшилганди. Бугун ёш кипер Чемпионлар лигаси чорак финалида "Интер"га қарши майдонга тушади.
"Урбиг - ажойиб дарвозабон. Унинг иштирокидаги ўйинларни кўп кўрмадим, лекин оёқ билан ўйнаш қобилиятига қойил қолдим. У менинг маслаҳатларимга муҳтож эмас. Мен Йонасга энг яхши тилакларни тилайман ва у билан майдонда учрашишни интиқлик билан кутмоқдаман," - деди "Интер"га ўтишидан олдин "Бавария" шарафини ҳимоя қилган Зоммер матбуот анжуманида.
