Милош Керкез "Борнмут"даги ишончли ўйинлари туфайли Европадаги энг талабгир чап қанот ҳимоячиларидан бирига айланди. Унинг Премьер-лигадаги муваффақияти Европа грандларини ҳам эътибордан четда қолдирмади. “Реал” ва “Бавария” венгерни анчадан буён диққат билан кузатиб туришибди. Мадридликлар бир неча ой олдин қизиқиш билдирган бўлса-да, мюнхенликлар фаоллиги воқеалар ривожини ўзгартириши мумкин.
Инглиз клуби футболчига бўлган қизиқиш ортиб бораётганини тушуниб турибди ва мавсум якунланганидан кейин уни сақлаб қола олмайди. Сўнгги ҳафталарда музокараларни кучайтирган "Бавария" Керкез уларнинг тизимига ва ўйин фалсафасига жуда мос келишига амин. Клуб трансферни таъминлаш учун катта сармоя киритилишини истисно этмаяпти.
Жорий мавсум Милош Керкез "Борнмут" сафида барча турнирлар доирасида 34 та ўйинда майдонга тушиб, 2 та гол урди ва 6 та голли узатмани амалга оширди.
