Дани Ольмо "Боруссия"га қарши ўйинда иштирок этиши мумкин.
"Барселона" ярим ҳимоячиси 27 март куни "Осасуна"га қарши ўйинда (3:0) ўнг оёғининг яқинлаштирувчи мушакларидан жароҳат олди. Унинг тикланиши тахминан уч ҳафта давом этиши тахмин қилинган эди.
Айни пайтда белгиланган вақтга амал қилинмоқда - Ольмо майдонга қайтишга яқин турибди. Футболчи аллақачон асосий гуруҳда бир нечта машғулот ўтказган.
Mundo Deportivo хабарига кўра, клуб Ольмонинг жорий мавсумда тез-тез жароҳат олаётганини инобатга олиб, унинг қайтиши билан таваккал қилишни истамаяпти. Бугунги "Леганес"га қарши ўйин футболчининг жорий мавсумда жароҳатлар туфайли ўтказиб юбораётган ўн бешинчи ўйини бўлади.
Ханси Флик ва мураббийлар штабининг режаларига кўра, Дани жамоа билан Чемпионлар Лигаси 1/4 финалининг жавоб ўйини учун Дортмундга бориши ва ўйиннинг боришига қараб, ўйин формасини тиклашни бошлаш учун майдонга тушиши мумкин.
Дастлабки ўйинда каталонияликлар "Боруссия"ни 4:0 ҳисобида мағлуб этишганди. Жавоб ўйини сешанба куни бўлиб ўтади.
