Қозоғистон президенти Қосим-Жўмарт Тўқаев томонидан мамлакатнинг бир қатор қонунларига ўзгартиришлар киритишни назарда тутувчи янги қонун имзоланди. Бу ҳақда Tengrinews хабар бермоқда.

Янги ҳужжат жисмоний тарбия ва спорт соҳасидаги давлат сиёсатини такомиллаштириш, ортиқча бюрократик тартибларни қисқартиришга қаратилган.

Эндиликда ваколатли органлар мамлакат миқёсида устувор спорт турлари рўйхатини шакллантиради, юқори натижаларга йўналтирилган спорт турларини аниқлайди ва уларни бюджет ҳисобидан молиялаштириш тартибини белгилайди.

Устувор спорт турлари халқаро майдондаги натижалар асосида белгиланади. Улар орасида Олимпия, Паралимпия, Осиё ва Параосиё ўйинлари дастурига кирувчи ҳамда миллий спорт турлари ҳам бўлади.

Шунингдек, спорт федерацияларини аккредитациядан ўтказиш тартиби такомиллаштирилди. Энди федерациялар миллий ва маҳаллий тоифаларга ажратилади.

Яна бир муҳим ўзгариш: хорижлик легионерларни бюджет ҳисобидан молиялаштириш тақиқланади. Бу тақиқ давлат бюджети ва квазидавлат сектор субъектлари маблағларини қамраб олади. Шахсий ҳомийлик эса тақиқланмаган.

Молиялаштириш тўртта йўналишда амалга оширилади:

Устувор спорт турлари;
Давлат спорт муассасаларининг фаолияти;
Оммавий спортни ривожлантириш;
Спорт инфратузилмасини ривожлантириш.
Қонунга кўра, антидопинг қоидаларини бузганлар бўйича чоралар кўриш ҳуқуқи ваколатли органларга берилади.

2024 йил ноябрь ойида депутат Асхат Аймағамбетов спортда легионерлар масаласида қонунчиликка ўзгартиришлар киритиш зарурлигини айтган эди. Унга кўра, Қозоғистонда ҳозирда 180 га яқин спорт тури молиялаштирилмоқда ва маблағлар ҳар томонга “сочилиб кетаётганини” таъкидлаган. Шу сабабли устуворликка эга спорт турларини ажратиб, маблағларни мақсадли йўналтириш зарурлиги қайд этилган.