"Кардифф Сити" ярим ҳимоячи Аарон Рэмзини вақтинчалик бош мураббий этиб тайинланганини эълон қилди.
Чемпионшипнинг 43-турида "Шеффилд Юнайтед"дан учралган мағлубиятдан сўнг (0:2) клуб ўтган йилнинг сентябрь ойидан буён жамоани бошқариб келаётган 45 ёшли англиялик Омер Ризни бош мураббийликдан четлатганини маълум қилди.
Унинг ўрнига 34 ёшли ярим ҳимоячи Аарон Рэмзи мавсум охиригача жамоани бошқаради.
Жорий мавсумда 34 ёшли уэльслик футболчи "Кардифф Сити" сафида барча мусобақаларда 10 та ўйин ўтказди (684 дақиқа).
Эслатиб ўтамиз, 2023 йилнинг ёзида Рэмзи 2006-2008 йилларда асосий жамоасида ўйнаган "Кардифф Сити"га қайтди.
2023 йилнинг июлида у клуб билан 2 йиллик - 2025 йилнинг ёзига қадар шартнома имзолади.
Рэмзи жамоадаги сўнгги учрашуви 2025 йилнинг 11 мартида "Лутон"га қарши ўйинда (1:2) бўлган. Шундан сўнг Аарон жароҳати сабаб жамоанинг ўйинларини ўтказиб юборди.
Чемпионат тугашига 3 тур қолган Уэльс жамоаси 23-ўринда жойлашган.
