22 ёшли украиналик марказий ҳимоячи Иля Забарний мавсум якунида "Борнмут"ни тарк этиши мумкин.
Yahoo нашри хабарига кўра, футболчига Франциянинг "ПСЖ" клуби қизиқиш билдирмоқда, бироқ Забарнийнинг ўзи Парижга ўтишни ўйламаяпти, чунки жамоада россиялик дарвозабон Матвей Сафонов бор. Бу борада украиналик футболчининг трансферига асосий давогарлар икки Лондон гранди бўлиб қолмоқда - "Челси" ва "Тоттенхэм". Айнан улар ўртасида ҳимоячини қўлга киритиш учун кураш кейинги трансфер ойнасида бошланади.
Жорий мавсумда Забарний "Борнмут" сафида 34 та ўйин ўтказди. Transfermarkt портали маълумотларига кўра, украиналик футболчининг бозор қиймати 40 миллион еврони ташкил қилади.
Кейинги турда “Борнмут” ўз майдонида “Манчестер Юнайтед”ни қабул қилади. Учрашув 27 апрелга белгиланган. 33 турдан кейин клуб 49 очко билан турнир жадвалида саккизинчи ўринда бормоқда.
