Дани Ольмо ва Пау Викторнинг иши Испания миллий судида кўриб чиқилади.
2 апрель куни Ла Лига каталонияликларнинг молиявий фейр-плей билан боғлиқ муаммолари ҳақида хабар бериб, клубда Ольмо ва Викторни рўйхатдан ўтказиш учун асос йўқлигини таъкидлади, чунки "Барса"нинг таркиб учун харажатлар чегараси яна пасайтирилганди. Бироқ, кейинчалик Олий спорт кенгаши (CSD) ўйинчиларни рўйхатдан ўтказишни маъқуллади ва Ла Лига апелляция берди.
Mundo Deportivo хабарига кўра, ўйинчиларни рўйхатдан ўтказиш бўйича CSD қарорини вақтинча тўхтатиб туриш тўғрисидаги илтимосномани рад этган маъмурий суд бу масалада ўзини лаёқатсиз деб топган. Иш Миллий судга оширилди, у бунинг учун зарур бўлган барча маълумотларни олгач, қарор чиқаради.
Дастлаб Ольмо ва Викторни рўйхатдан ўтказиш масаласи шу ҳафтада ҳал бўлиши тахмин қилинганди, бироқ иш юқори турувчи органга ўтказилгач, қарор чиқариш учун кўпроқ вақт талаб этилади. Шу тариқа футболчилар катта эҳтимол билан Испания кубоги финалида "Реал" билан ўйнаши ва мавсумни Ла Лигада якунлаши мумкин бўлади.
