Испания ёшлар терма жамоаси футболчиси ва "Барселона" ҳимоячиси Жерар Мартин 21 ёшгача бўлган футболчилар ўртасидаги Европа чемпионати доирасида Словакияга қарши ўйинда (3:2) жароҳат олиб сафдан чиқди.
Каталония клуби матбуот хизмати тарқатган хабарга кўра, Мартинга ўнг қўлининг бешинчи кафт суяги асоси чиқиши ташхиси қўйилган. Жарроҳлик амалиёти сешанба кунига режалаштирилган бўлиб, операция "Барса" тиббий штаби назорати остида ўтказилади.
- Жарроҳлик амалиётидан сўнг тикланиш муддатлари ҳақида қўшимча маълумот берилади, - дея қўшимча қилди клуб.
Якунланган мавсумда Мартин "Барселона" сафида барча мусобақаларда 42 та ўйинда майдонга тушиб, 1 та гол ва 6 та голли узатмани амалга оширди.
