Ҳужумкор ярим ҳимоячи Иван Перишич ПСВ билан шартномасини узайтирди. Эйндховен клуби ўзининг расмий сайтида 36 ёшли хорватиялик футболчи билан 2027 йилнинг ўрталарига қадар икки мавсумлик шартнома имзолаганини эълон қилди.

"Бу мен, оилам ва яқинларим учун ажойиб кун. Ўтган мавсумни ажойиб ўтказдик. Қийин бўлди, аммо чемпионликни қўлга киритиш катта воқеа бўлди. Мухлисларимиз ажойиб бўлишди. Умид қиламанки, биз футболчилар ҳам мухлислар билан биргаликда янги мавсумда олдинга қадам ташлаймиз", - дейди Перишич.

Иван Перишич ўтган йилнинг сентябрида ПСВга келиб қўшилганди. Ўшандан бери хорватиялик футболчи 35 та ўйин ўтказиб, 16 та гол урди ва жамоадошлари учун 11 та голли узатмани амалга оширди.