Мадриднинг "Реал" клубида жамоада ишлашни истамаётган футболчиларга қарши кураш бошланди. Клуб раҳбарияти ва мураббий Хаби Алонсо футболчиларга "Жамоа учун 100 фоиз борини бермаган ҳар қандай инсонга қийин бўлади," деган фикрни етказишга ҳаракат қилмоқда. Бундан ташқари, Marca хабарига кўра, "қаймоқранглилар" босслари мураббийга ўзи хоҳлаган ҳар қандай ўйинчини, жумладан, асосий юлдузларни ҳам захира ўриндиғига ўтқазиши мумкинлигини тушунтирган.

"Жамоа учун ишлаш" деганда, шубҳасиз, мудофаа ҳаракатлари ва прессингда иштирок этиш назарда тутилади. Бу муаммо Карло Анчелотти даврида "Реал"нинг сўнгги мавсумдаги муваффақиятсизликларининг асосий сабабларидан бири ҳисобланган ва Хаби Алонсо вазиятни ўнглаш ва тўпсиз ўйинда бирдамликка эришиш ниятида эканлигини бир неча бор таъкидлаган.