Туриннинг "Ювентус" клубига тегишли бўлган бразилиялик хавбек Дуглас Луис Англия чемпионатига қайтиши мумкин. Бу ҳақда Football Insider хабар бермоқда.
Журналистлар маълумотига кўра, 27 ёшли ярим ҳимоячининг трансферига "Эвертон" қизиқиш билдирмоқда. Потенциал битим суммаси 46 миллион еврога баҳоланмоқда. Эслатиб ўтамиз, бразилиялик футболчи "кекса синьора" сафига ўтгунига қадар Бирмингемнинг "Астон Вилла" клуби шарафини ҳимоя қилган.
Ўтган мавсумда Дуглас "Ювентус" сафида 27 та ўйин ўтказган. Луис ва Турин клуби ўртасидаги амалдаги меҳнат шартномаси 2029 йилнинг ёзида якунига етади.
