Ҳужумкор ярим ҳимоячи Рейньер "Реал"ни тарк этиб, "Атлетико Минейро"га кўчиб ўтди. Ла Лига гранди расмий сайти орқали 23 ёшли футболчи билан хайрлашганини эълон қилди. Бразилиялик футболчи янги клубига текинга ўтди, бироқ аввалроқ ОАВда хабар қилинганидек, "қаймоқранглилар" бўлажак қайта сотув суммасининг ярмини олади.
"Реал" Рейньерни 2020 йил бошида "Фламенго"дан 30 млн еврога сотиб олганди. Хавбек ўсиб келаётган юлдуз ҳисобланарди, бироқ у Европада ўзини кўрсата олмади. Катта умидларга эга бўлган футболчи ижара асосида ўйнаган Дортмунднинг "Боруссия", "Жирона", "Фрозиноне" ва "Гранада" клубларида ўз кучини синаб кўрди. У мадридликларнинг асосий жамоасида бирорта ўйин ўтказмади.
