Туркиянинг "Истанбул Башакшеҳир" клуби хавбек Аббосбек Файзуллаев трансфери учун ҳали Москванинг ЦСКА клуби билан ҳисоб-китоб қилгани йўқ. Бу ҳақда "ҳарбийлар" клуби вакили Кирилл Брейдо маълум қилди.
"Ҳозирча ЦСКА Аббоснинг трансфери учун пул олгани йўқ. Биз турк клуби билан ёзишмалар олиб боряпмиз. Пулни шу ҳафтада кутамиз," - дея Брейдонинг сўзларини келтиради "Спорт-Экспресс."
21 ёшли ярим ҳимоячи июль ойи охирида Москва клубини тарк этганди. Аббосбек турклар билан беш йиллик меҳнат шартномасини имзолади. Transfermarkt портали маълумотларига кўра, Файзуллаевнинг трансфери "Истанбул Башакшеҳир"га саккиз миллион еврога тушган.













