Ҳужумчи Николас Жексон жорий трансфер ойнасида Лондоннинг "Челси" клубини тарк этиши мумкин. Telegraph журналистларига маълум бўлишича, сенегаллик футболчига АПЛнинг бошқа бир клуби - "Ньюкасл"дан таклиф бор.
"Ҳаккалар" жамоанинг ҳужум чизиғини кучайтирмоқчи ва Николасни ёзги трансферлар ойнаси ёпилгунга қадар ўз сафига қўшиб олмоқчи. Шу билан бирга, эҳтимолий битим суммаси тахминан 75 миллион еврога баҳоланмоқда.
Африкалик футболчи икки йил муқаддам "аристократлар" сафига келиб қўшилган эди. Ҳужумчи лондонликлар билан 2033 йилнинг ярмигача шартнома мажбуриятлари бўйича боғланган.
Николас Англия чемпионатининг ўтган мавсумида 30 та ўйинда майдонга тушиб, 10 та гол ва 5 та голли узатмани ўз ҳисобига ёздириб қўйди.
