Испаниянинг “Жирона” клубига янги келган Владислав Ванат Украина чемпионати савиясига баҳо берди.

Бу ҳақда футболчи клуб матбуот хизматига берган изоҳида айтиб ўтди.

Ҳужумчи урушнинг Украина футболига салбий таъсирини таъкидлади. Шунга қарамай, у келажакка ишонади.

"Ҳозир, менимча, у унчалик яхши савияда эмас, чунки бизда уруш бор. Бундай вазиятда ўйнаш қийин.

Ҳозир кўплаб янги клублар ва яхши жамоалар пайдо бўлмоқда. Ўйлайманки, икки-уч йилдан кейин ҳаммаси яхшиланиши мумкин", — деди Ванат.

Эслатиб ўтамиз, украиналик футболчининг шартномаси 2030 йилгача мўлжалланган. Янги клубида Владислав 19-рақам остида ўйнайди.

Испания клуби трансфернинг молиявий тафсилотларини айтмаяпти, бироқ аввалроқ "Жирона" Ванатнинг 20 миллион евролик бандини фаоллаштириши ҳақида маълумот пайдо бўлганди.